ياذي تمنيتش وفي قلبي تربع منزلش*والقلب منزل لش فرش عفة وحشمة واحتواش
سيري وجي بيتش حلالش ليت عمري يكفلش*وتعيشي ايامي مع عمرش وانا ميت فداش
قبل اعرفش شافش خيالي وارتسم فيه شخص لش*واليوم ذي شافه خيالي قد تحقق في لقاش
قد جملش ربي بأخلا قش وخلقش كملش*والله ماغير احتشامش من شبكني في هواش
أرخصت عمري لش ولويفداش ماني مهملش*وقبلش اغلى من كنوز الأرض عمري والمعاش
بهديش كل الحب في كل الثواني يوصلش*والقلب عندش قد سلبتيني وطرتي في سماش
قلبي وقلبش في يد الرحمن قدرلي ولش*بين اصبعي ربي يقلبها وهوكمل حلاش
ياساكنة في سفح صنعاء ليت وانا جارلش*في الصبح اشوفش والمسا تالي أقول يسعد مساش
انا كتمتش سر في الأعماق ماحد يوصلش*كلا ولا يدري خبر قالوا علي عاشق لماش
من شافني وانا لحالي قال يا سعداه لش*ياذي سكنتي قلب زين العابدين ذي كان شاش
أجلس لوحدي والتفت صوب الخيال واقول لش*يابنت الا جواد ارفقي بالقلب ذي عيشه وياش
جدش تعزى في بلاد العز واسدى العز لش*وابن الكميم عزه نذر به لش فرض عزش غلاش
انتي عرفتي عفتي في الحب والآن اسئلش*عهدش عيبقى للأبد والا عهودش ذي خشاش
لوكانت الأخرى علي اترحمي مقتول لش*ياكيف اعيش من غير روحي حبكم في الروح جاش
والله لوكنتي على الاعصي وكرسي يحملش*أو يشتعل راسش شعر بيضا وتتهاون قواش
لا يعشقش قلبي ويسحدث غرامي بس لش*أنا هويتش لش لدينش حشمتش قلبي حماش
لو خيروني بين مافي الأرض والا اكون لش*لا قول خلوني معاها يوم ويبعد كل واش
حبش قدر وانا ارتضيته ما تعطش غير لش*والا بلاد الله ملئى ماقتحم قلبي سواش
أول عهودي بش بدون انذار قلبي حن لش*وانا تبعت القلب في حبش وجرجرني هواش
والختم صلينا على طه منجي لي ولش*من حر نار الويل عدد مايملي الدنيا رشاش
Bookmarks