الناس ناموا وأنا العبـرات أجاذبهـا
جذب الدلي من معينٍ وردها حيامـي
بيديـن بـدوٍ مشافيـحٍ تناهبـهـا
في نقضة الجزو والماء ورده حزامي
أشوف وأنكر مـن الدنيـا مذاهبهـا
تضرب بنا أمواجها في بحرها الطامي
ياكثـر روعاتهـا وقسـوة تقلبهـا
ماطاب فيها مـن الأحـوال مادامـي
اللي منول ركوبـه فـوق غاربهـا
ماحصّل ردوفها والمشـي درهامـي
تستدرج أهل الأماني فـي مكاسبهـا
لكن هيهات تصدق فيهـا الأحلامـي
من صدّق الريـح وعيونـه يكذّبهـا
كنه يقارن غبـاه بفرصـة الرامـي
تمـر الأيـام ماكـنّـي مجرّبـهـا
من تضحكه يوم يبكي باقـي العامـي
يالله يالله تكفـيـنـا نشـايـبـهـا
ياواحدٍ عن قضايـا الخلـق مانامـي
ياعالـمٍ غيـب نفسـي لاتعذّبـهـا
تكتب لها حجةٍ من نـور الإسلامـي
واليوم ماباقـي ألاّ أشـوف طالبهـا
والموعد المنتظـر تدنيـه الأيامـي
لنـا مواعيـد مانـقـدر نجنّبـهـا
توقيتها محكمٍ فـي وقتـه احكامـي
ترمي المنايـا ولاتخطـي مضاربهـا
من صوّبنّه سهوم الوقـت ماقامـي
ساعة حياته ليـا وقفـت عقاربهـا
الروح تصعد ويبقى جرحـه الدامـي
والمـوت ماتصلـح أرواحٍ يخرّبهـا
أبا أترك الزوج والأطفـال الأيتامـي
لا واعزا النفس من فرقـا حبايبهـا
ياطول فرقاً تعثّـر فيهـا الأقدامـي
لابد مـن رحلـةٍ مايعـود غايبهـا
وعن الحقايق توارى كل الأوهامـي
معـي الوثايـق مختّمـةٍ قوالبـهـا
والخوف من نقطة التفتيـش قدّامـي
في مفترق طرق ياكافـي مصايبهـا
حدى الطريقين واحد منهن إلزامـي
أمّا مع أهل اليميـن وعـز جانبهـا
وألاّ مع أهل الشمال وشرّها الحامـي
رحماك رحمـاك يامـذري هبايبهـا
ياوامر المسلمين بوصـل الأرحامـي
دعـوة طريـح الخطايـا لا تخيّبهـا
أنا ضعيف الوسائل والهدف سامـي
ياوردة النفـس ناضبـةٍ مشاربهـا
يالله من شربةٍ تقطع ظمـا الظامـي
واجيرنا من الجحيـم وحـر لاهبهـا
وأنت الذي من لجى بحماك مايضامي
شعر / محمد العسيلي الحربي
Bookmarks