الســــــــــــــــــــلام عليكم ورحمة الله وبركاته
الأخوه والأخوة جميـــعاً حيـــــــــــاكم الله
أهــــــــــدي هذه القصيده والرد عليها لكل عضـــــــــوء مشـــارك في مسابقة الشعر التناظريه
ولكـــــــــــــل من عقب هنـــــــــالك ...
إي بالله أخطوا والخطا الي جابهم عين الصواب
مبطي وأنا أشوف الطمع يكشف زادهم واستره
ما يوزن احكام الملا لي ما عرف قدر النِّصَاب
واللوم يا شاعر على زيف المشاعر والشَّره
مايملي عين الحسود بهالزمن غير التراب
ومن لايتوب من الخطا تحرم عليه المعذره
ما يستمع نصح الحقود بذمتي لو هو أصاب
واللي توكّل بالقدر تسري عليه المقدره
اللي من أولها خراب أكيد تاليها خراب
والبندق الي ماتثور في هدفها تذعره
إن جيت تزرع بالضما أرضك تلاقيها حِراب
مثل الذي يزرع شعير وينتظر حَصْد الذُّرَه
ودّك ليا من جاتك الغلطه من الناس القراب
الصاحب اللي ما كسبت محبته ما تخسره
يا صاح لو تبني قصور العز وأركانك ضباب
محّد يداوي بالعنا جرح المودّه ويجبره
مشكلتي إني ماعرفت أحسب لصدتهم حساب
قلطتهم صدري على ذكرى قصيد وحنجره
لو يجمع حروفه على رسم الشّتايم والسّباب
لو يشتري ايوان كسرى أو يصاحب عنتره
صوت يصول بمنبره واخطاب ما مثله خطاب
والطيبه اللي زعزعت صوت الخطيب ومنبره
يضيع ذاك اللي يبي يصنع من امجداه ثياب
واللي تولّع بالغوى يعشق رموز الجيكره
مافيه دمعٍ صوبوه أحبابي بوجهي وخاب
ولازرق حزني على غالي ولافج انحره
لو هو على قوسين غايه صار أدنى والا قاب
لا ما يطول اللي توسّد من بحاره محبَره
كل الزهاب اللي معي ذكرى من أصحاب الزهاب
واللي بقالي من عذاب أشرس طريقي وأخطره
العالِم اللي طول عمره ما توفّق بالثّواب
يروح عمره في عذاب الهون بسم الدكتَرَه
لأني تجنبت الغرق..عديت من فوق السحاب
لأن أكثر أصحابي ورق..ماشفت للطيبه إثمره
العاشق اللي ما تهنّا في مشاويره وطاب
احلامه اللي شادها صارت بلحظه مقبَرَه
والله ماحطيت بين الحقد والخوة حجاب
حتى غدوا ربعي يحدوني على الضيق أشكره
يا شين اشباه الرجال اللي ولا تفهم خطاب
بنجومها واطيورها يا نعنبوها عَسْكَرَه
البارحة ثارت علي رقاب وآوتني ارقاب
البارحة ياثقل دم البارح ويــامـــحقـــره
اناشْهد انك بالشعر حامد ولا مثلك يعاب
المشكله يا صاحبي انّك عشقت الفشخره
أثر الصايب ماتجيك الا من الناس القراب
وبهالزمن حتى الخوي الي تثق فيه احذره
خالفت أشعار النَّبط كرّرت بأقوالك عتاب
الصّدق انّك معتلي يا صاح عرش الثرثره
أهب ياوجه الحسد وشلون جمَّعهم وغاب
كيف السنين الي عطتني بعثرتهم بعثره
ما شاب من قولك سوى سود الليالي والغراب
لانّك محقت بأحرفك ياذاك أهل السمكره
لابارك الله في رفيق تزعله كلمة عتاب
ولاجمع الله الرجال اللي تفرقهم مره
الجاهل اللي يعتني حمل الاواني والقراب
يرحل على كل الدروب يصيح بأعلى حنجره
الصاحب اللي مايجي من صحبته غير العذاب
نذر علي ان ماهجرني وإلا انا اللي بـ أهجره
في عصرنا صار الأدب بالحيل مثل الإكتتاب
والشعر في سوق العرب مثل التجاره سمسره
من يفتح لفرقاي باب أفك له عشرين باب
وإذا خويي مايقدر خوّتي ما أقدره
الساري اللي لى سرى لا ما يفكر بالإياب
وبراس ثعبان الفلا للموت ناب وجوهره
عوّدت نفسي كل ماشددت لليمّه ركاب
ما أصد وجهي عن طموح إلا ليا جبت خبره
شط المعالي مختفي والموج بدروبه عباب
واللـــّـه ما تسوى جميع الكون حدّ القيصره
إن روّحوا فأنا بريٍ منهم ليوم الحساب
وإن جرحوا قولوا لهم ماحركوا فيَّ اشعره
اخلاقنا بين الغلا روض الفيافي والشّعاب
لو هي على شطّ العرب ردّت صداها أسمره
شفهم لهم حول السنه ولاخذوا مني جواب
أحسن دوا للي يحاول يستفزك تحقره
الغازي اللي ما عرف في دنيته مربط ركاب
عزّ الله ان اللي يمثلها بربعه تَحْقِرَه
ماكنت احاتيهم صغيرّ..عاد احاتيهم شباب
الصاحب اللي ما اذخره لليوم الأسود ما اذخره
هذه الحريم اللي بها طفل القوافي اليوم عاب
لولاها ما كنت حروف الوجد فيك مبعثره
شفني جمعت أوراقهم بكتاب وأغلقت الكتاب
ياوقت لم اللي تلمه وانثر اللي تنثره
الصادقات ودربها بين الخوالي كالشهاب
سبحان ربي لى وهب من جود عطفه مغفره
اللي يخاف من الظما يترك لنا طرد السراب
واللي ماهو بقد الظلام ووحشته لايسهره
الطاهرات وطهرها خلف العبايه والنّقاب
الساهرات وليلها لأجلك يا غاوي تنذره
عقب اكتئاب البارحة ماعاد أنا حمل إكتئاب
الطيب جرجرني وأنا ماني ناقص جرجره
توّك صغـيّر ما عرفت اشلون تمسح هاللعاب
وان كنت تشتهد بذات الزيف لاجل المسخره
أنا تجرعت الظما لين احترق وجهي وذاب
أنا كسرت بخاطري قبل الصداقه تكسره
المائلات اللي على أطرافها نقش الخضاب
العابرات اللي تعوّدنا خروج السرسره
أنا خسرت اللي غيابه غير عن كل الغياب
أنا غفرت لعالمٍ ماتستحق الـمـغـفــره
يا صاح ما تصنع شموخ العز أكواب الشراب
اسأل دخاترت البلى وإياك واهل البيطره
أنا أكثر (انسانٍ) تعلم من كثر ما أخطأ واصاب
أنا آخر (لسان) يتكلم في زمن الـثـرثـره
اترك هروجك واستمع لي يا مجمهر الف شاب
هذاك ملعبنا وانا واياك والثالث كُــــــــــــــــــرَه
أنا القصيد اللي فزع من دفتره مليون ناب
وأنا الوحيد اللي جمع مليون ناب بدفتره
اللعب ماهو بالورق والا بتحريك الذِّناب
اللّـعب فـن واتـزان وعقب هذا مَيْدَره
جفني وجرّحْه السهر،حيلي وهدّته الصعاب
دمعي هدر،ضحكي ندر،عمري وضيعت أكثره
ان جيت في ارضي تشوف جبال تعقبها هضاب
الخوف من ذاك الغشيم اللي حسبها مجزره
شيبّت بعقول العرب..هيبّت روس ماتهاب
جمهرت ناسٍ عمرهم مايعرفون الجمهره
الشاعر اللي يفتخر بعروبته والانتساب
ياذاك لو تفهم تجيب المــتر قبل المسطره
ماصرت ذيب إلا لأن اللي تحدوني ذياب
ماكنت أغيب إلا لأن العفو عند المقدره
ان شفت انياب الأسد لا تحسب انّه كالنياب
حدّي انا هزّ الشباك وانت حدّك سَنْتَرَه
ترى حلاتك لاحملت لصاحبك كلمه عتاب
أنا مانطقت بها بوجهه ماتذمه بظهره
ابسألك ليش الذي مثلك تألم يوم خاب؟
تقول يمكن مالقى في دار جاره تَنْجَرَه
في هالزمن مايملي عيون الحسود الا التراب
والا الحظيظ..الطلقه اللي ماتصيبه تذعره
المخطي اللي ماعرف في دنيته طعم العقاب
خلّه على درب الخطا ..دام الخطاوي غشْمَرَه
....................... تحيــــــــــــــــــــــاتي للجميع ..............................
Bookmarks