غدر الخناجر

**ا.مـ.يـ.ر.ا.لـ.بـ.ح.ـاار** · 14-03-2006, 05:19 PM

عفالله عن خطا غدر الخناجر والضلوع ابطال...بسامح واتركك تحت الظلام الحالك لحالك
دخيلك وفر دموعك ترى هدر الدموع اذلال...وترى مافيه احد يصبر مثل صبري بغربالك
انا عيب علي انقض كلامي والرجال افعال...واذا قلت اقطع حبالك تراني بقطع حبالك
عشان اكسب هدب عينك تجرعت العذاب اشكال...وليتك ترأف بحالي علشان ارأف بحالك
مسوي في حياتي شي مايذكر ولا ينقال...حشى حتى العدو وهو العدو مايعمل اعمالك
تمسيني على الهم وتصبحني على الغربال...تقلطني فناجيلك وتقصر عني ادلالك
تحملت التعب لجلك وانا حملي يهد جبال...رحلت من العذاب وما وقفت الا على جالك
علامك..كل ما اجيك متواضع جيتني تختال...معاك ليامتى بصبر وصبري معك يحلالك
مثل ما اقبلت لعيونك لزوم تردلي بقبال ...ومثل ما قد حشمتك حس واحشم قلب يشوالك
انا محد بجابرني اساير معك هالمنوال ...ترى لاني تبيع لك ولاني باصغر عيالك
انا جيت اعشقك نبض ومشاعر ما اعشقك تمثال...انا جيت اسكنك واحياك وابقى فيك وابقالك
انا جيت بظمى عاشق تعب يطرد سراب اللال...انا جيت استفز رضاك من فرقاك واللجالك
انا ماهمتبك عاقل انا كنت اعشقك بخبال...انا ما كنت احبك حي انا كنت اعشقك هالك
تخيل من كثر ما اخاف تلقى للزعل مدخال...اخاف اخطي على طيفك وادوس برجلي ظلالك
تبعتك والعرب تتبع رعود البارق الهمال...وانا شفت المطر يتبعك في حالك وترحالك
كان الي خلق حزنك خلقني مع جسدك ظلال...وصرت اقرب جسد يمشي معك بقفاك وقبالك
ابي قلبك يحس انه فقد بمحبته رجال...ملكته من هدب عين وخسرت رضاه بهمالك
صحيح ان الفراق اقسى ولاكن الوصال محال...وانا صعب علي ارضي غرورك واضعف قبالك
بعد ماحققت عيني فبعدك للرقاد آمال...اعود للسهر ياخوي فال الله ولا فالك
ببدل نظرتك فيني واجيلك كل يوم بحال...بكون اقرب من ثيابك عليك ولاتهيالك
بلمك وانثرك واجمعك وارجع وانثرك بهمال...بخونك وازعلك وارضيك وازعل منك وارضالك
ابرسم بالثرى وجهك وابرسم صورتك برمال...ابشكي للعرب فرقاك واضحك عند عذالك
ابهديك الوصال فراق والفراق وصال...بسوي مثل ما اشوفك تسوي وافعل افعالك
ابيك تعرف من فينا الزعول ومن وسيع البال...ابيك تذوق فنجالي وانا بذوق فنجالك
نصيحه واحتفظ فيها قصر معك الزمن اوطال...ابي تسمع كلامي زين وتحطه على بالك
اذا حبك هبال اطفال الك عندي هبال اطفال...ولا وابشر بعد بهبال حب ماهو بهبالك
واذا كان قصدك تهين اسمي عشان تشمت العذال...حشى لنته ولاغيرك ولا عشره من امثالك

**أمــAmonــون** · 15-03-2006, 12:19 AM

حياك أخوي ..

كلماتك رائعة ..

ابدعت

أختك أمووون === أماني

**mjahd2005** · 27-03-2006, 03:43 AM

مثل ما اقبلت لعيونك لزوم تردلي بقبال ...ومثل ما قد حشمتك حس واحشم قلب يشوالك
انا محد بجابرني اساير معك هالمنوال ...ترى لاني تبيع لك ولاني باصغر عيالك

مشكووور يالغالي

لا هانت يمناك ولا يسراك بعد هههههههه ولا تزعل