هو ماينغّـم داعـج العيـن ياخـال=أو يتّصل أو بس يرسـل رسالـه
فيها يطمّنّـي بوضعـه والاحـوال=لجل المتيّـم فيـه يرتـاح بالـه
ياخال ماغابت دقيقـة عـن البـال=واقسـم بربـي ماهنانـي بدالـه
راحت ومعها روّحت كـل الآمـال=واللي سواتي صار يرثـى لحالـه
قمت آتعذّر يوم غابـت بالارسـال=وآقـول : جوّالـي بـدا بالنذالـه
وآلوم منهم صمّموا وضـع الاقفـال=وارجع واعزّي خافقي في غزالـه
ويدور في صدري من الهـمّ مـوّال=موّال فيني مااستطعـت احتمالـه
يمكن دروا هلها بمـا بيننـا جـال=وكالوا عليها الضرب وارخوا حباله
او يمكن انها صدّقت قـول عـذال=ناس(ن) تسمّـت بيننـا بالحثالـه
من مدّ له يمناه في ضرب وشمـال=عسـى يمينـه ماتلاقـي شمالـه
ياالله عسى راسه من المتن ينشـال=ويصير راسه عن متونـه لحالـه
ويضيع دمّه بيـن تسعيـن رجّـال=مامنهم الاّ مـن يحـب الشكالـه
ياخال بلّغهـا تـرى القلـب لازال=على امل شوفه ورجوى اتّصالـه
هي مادرت بان الجفا سهـم قتّـال=والوصل بين امثالنـا مايبـى لـه
ماغير تضغط زرّ في وسط جـوّال=ويكون معها من تمنّـت وصالـه
ياليـت والله مـن لعنوانهـا نـال=ويجي من الفرحة يسابـق ظلالـه
ان جيت اوصّفها فلانـي بمحتـال=يضيع وصفي في مواطن جمالـه
شفت البراءة لى كست وجه الاطفال=شفت العزيز اللي يربّـي عيالـه
شفت الشّموخ اللي بدا فيـه خيّـال=شفت البدر بالليل عنـد اكتمالـه
يعني اختصر لك في عبارات وامثال=الكون كلّه يستقـي مـن خصالـه
هي منبع الرّقّة وهي خيـر تمثـال=هي غاية العاشـق وقمّـة خيالـه
كنت اضحك من اللي يحبون بهبـال=وآقول ذوولـي عايشيـن بخبالـه
الين ماطحت بهوى حسـن الاقبـال=اللي غرامـه تـلّ قلبـي وشالـه
على حسب نيّاتنا جـات الأعمـال=يـارب زيّنهـا تجـي بالسهالـه
ون كانها ماجـات فالحـق ينقـال=ماودّنا نصبح على النـاس عالـه
Bookmarks