تدري انه في خفوقي ماسكن غير انت ياللي
هز عرش القلب واستاسر جنوده واستباحه
========
استبحت احماه واجتحته بجيشك لين ذلي
صار مطواع يجي بالمستحيله والمتاحه
========
الفواد اللي على الخفرات ذابحه التغلي
كان حوله سور وانت اللي ضرب عالي شباحه
=======
كان فيه ابواب ماتفتح ولا يمكن تدلي
لين حتى جيت يالمزيون واعلنت افتتاحه
=======
من غزاني طرفك المكحول بسيوف تسلي
والعلوم اعلوم والحاله تغالبها الفداحه
=======
تدري اني قلت ابهرب منك واثري جيت كلي
جيت ادور عقب ضاق الكون بعيونك مساحه
=======
اولا كنت العدو بو جيش واليوم انت خلي
والله انك في فوادي من سناحه لي سناحه
=======
كيف لا وانت الحبيب اللي خفوقي بك يهلي
لـ انشرح من عقب ذكر الله تراك انت انشراحه
=======
انت يامن لك وصوف وش نقول ووش نخلي
ان وفيتك حق ون قصرت فـ اطلبك السماحه
========
لك رموش كن خدك في ذراها يستظلي
كلما حركتها كسرت في قلبي رماحه
========
وكلما لديتها صوبي تتل القلب تلي
كنها تستدرجه للشوق وا تدمي جراحه
=======
والنحر والعنق واللبه ومجدول يفلي
لـ انتثر من فوقها المجدول لبسها وشاحه
==========
ياحبيبي والسوال اللي يدور منك حلي
هو طريح الحب لامن طاح يبطي في مطاحه
========
ياحبيبي يابعد عمري دخيل احماك قلي
لي متى الفلاح مايدري متى وقت الفلاحه
========
ياحبيبي لي متى الغيمه تحن ولا تهلي
لي متى شمس الوفا تغرب قبل يولد صباحه
=======
ياحبيبي عقب مابينت لك دقي وجلي
خذ كلام مبتداه الصدق واتلاه الصراحه
========
مايداويني ويشفيني ويبري منك غلي
كود اعانق سلسبيل الروح واشرب من قراحه
أتمنى أن تحوز على رضاكم
طبعا منقول لو إني قايل هذي الأبيات بصراحه بكون إسطوره
تحياتي
Reply With Quote
Bookmarks