السلام عليكم
بناء على طلب الجماهير من فترة طويلة – حتى من قبل إنشاء المنتدى – قررت جماعة ظرفاء فينه كتابة دروس فى النكت عشان أولا نساعد الناس اللى بتقول النكت
وثانيا نساعد الناس اللى بتسمع النكت (فاهمين طبعا)
وعلى فكرة مش أنا اللى كاتب الدروس دى (مش عايزين ننضرب اليومين دول)
ده واحد بلدياتى بيكتبها وبيبعتها لى مربوطة فى رجل الحمام الزاجل ..أصل الحكومة مانعة أى منشورات خاصة بالنكت ..
المهم .. نبدأ بإذن لله ..
=====================
القعدة الأول :



كيفك تقول النكت بدون معلم ..
أولا:النكت مش محتاجة معلم .. لكن محتاجة إحساس عالى جدا .. يعنى لما تحس ان اللى قدامك متنرفز أو سريع الغصب أو عصبى أو إيده تقيله .. لازم يبقى بينك وبينه مسافة لا تقل عن نصف متر عند بداية الإلقاء (قابلة للزيادة أثناء الإلقاء بطريقة الإنسحاب المنظم) ..


ثانيا:سرعة البديهة مطلوبة جدا .. يعنى وأنت بتقول النكتة .. إحترس من إعطاء ظهرك للخصم (اللى بيسمع النكتة يعنى).. لماذا ؟
عشان تدى نفسك الفرصة تشوف أى تغيير مفاجئ فى تعبيرات وجهه .. مما يوفر لك عمرا أطول لإلقاء المزيد من النكت (ده يتوقف على سرعتك فى الجرى بقى)..


ثالثا:العاقل من إتعظ ..
يعنى ماتقولش نفس النكتة لنفس الشحض مرتين .. لو استحملك أول مرة جايز جدا مايتسحملكش التانية.(مش كل مرة تسلم الجرة)..


رابعا:اعرف عدوك..
يعنى ماتروحش لواحد هندى تقوله نكت علىالهنود .. يمكن يحس أنك بتتكلم عن إيه تبقى مصيبة ..(ربنا يستر )..


خامسا:التراجع وقت اللزوم..
يعنى وانت بتقول النكتة لو حسيت بتغيير فى تعبيرات وجه الخصم (راجع ثانيا).. ومالقيتش فرصة للجرى .. مفيش مانع تغير الموضوع .. (تسأله عن صحته ..الدنيا حر النهاردة..أنا جعان..أى حاجة من دى)..


سادسا:التشبس بالحياة ..
ممكن حظك يطلع وحش مرة(لو مش أكتر) ويتمكن الخصم منك .. فإن لم تكن ممن يمارسون الرياضات العنيفة (أنصحك بممارسة واحدة على الأقل لو كنت ناوى تستمر فى موضوع النكت) فعليك بالإحتمال وعدم المقاومة حتى لا تزيد من عنف وشراسة الخصم ..وتذكر أن فرصتك فى الإنتقام ستأتى يوما .. يعنى هى النكت خلصت!


سابعا:العاقل من إدخر ..
لأن مصاريف العلاج تزيد بإستمرار .. ولأن محدش ضامن الظروف .. أنصحك تفتح حساب بنكى خاص بمصاريف علاج إصابات النكت..وهتبقى تدعى لى إن شاء الله.


ثامنا:السرية التامة..
لو حد عرف إن إصابتك كانت نتيجة نكتة .. هتنتشر الأخبار ..والأعداء هياخدوا حذرهم ..مما يفقدك الكثير من الفرص للترقب والفرار وما الى ذلك .. فضلا عن فرصة الإيقاع بالخصم فى الأساس ..لأنهم غالبا مش هيدوك الفرصة عشان تبدأ..


و إلى لقاء آخر مع القعدة التانية إن شاء الله