الدهر كاسين عذبه من هماجه
والرزايا ليلها يطوي ضحاها
والرفيق أحتج له قبل احتجاجه
من ضميري والكرام اكرم لحاها
والردي مااحسب لعدله وا نعواجه
والمودة معه مقطوع(ن) عراها
وان رضي ولا قنع يوم المواجه
مابعد نور العيون الا عماها
تاج راسي طيب جداني وتاجه
ماجمع جوف الجيوب وما ملاها
ماعرف أجامل ولا احب اللجاجه
والمواقف مالها الا من حماها
والتذلل والتدري والسماجة
سلعة اللي باع وجهه واشتراها
ناج قلبي ياحمام الورق ناجه
هجرس لحونك واهجرس لك وراها
غنها لين الضحى يقدح سراجه
عن روح(ن) للعزا مالله هداها
لو معك قلب(ن) ولك بال(ن) مزاجه
مثل مالي ماتركتك في عناها
سقتها لك والزمن يكسر عجاجه
من هجوس العوج ولا من عواها
وانت سبل دمعتك والحزن لاجه
لين تغرق ريشتك في حر ماها
شاعر(ن) راحت طواريقه علاجه
كنه أشوا لابدا رجم وبداها
روحت رابع سنة مطلق حجاجه
ناشبته العبرة اللي وش مداها
علقت مابين حزنه وابتهاجه
ماومرها الله تروح ولابكاها
في غلا من ضيق صدري وانفراجه
صدت(ن) منها وضحكة من شفاها
أنكرتنا أيامنا والليل داجه
غيب اللي جعل ينسى من نساها
باقي(ن) من رمح فرقاها زراجه
فالمحاني ماشلعته من غلاها
ذكريات ومن نزل صدري وساجه
له حروفه قصها ولا رواها
مالي الا أصبر ولوصبري نتاجه
أح يافح الضلوع وياشقاها
إن عذلت العين جا قلبي خلاجه
وان قدرت القلب جا عيني بلاها
وان ذكرت الدمع منها واندراجه
وارتعاشة كفها وآخر رجاها
والكلام اللي من الشريان زاجه
حال دونه حزنها مدري سحاها
مابقى لي فوق سمك الأرض حاجه
استوى اللي تحتها واللي مشاها
هذي الابيات لشاعر القدير (ابو فهد) خالد العتيبي........واتمنى تنال اعجابكم....
تحياتي .........للجميع..
منقوووووووووووووووول.....
Bookmarks