وبعد ماخلفوا وكبروا اولادهم:-
عشعش وبإيدها الرضاعه وابنها يبكي: بس بس حبيبي، بس ياسلومي بس، ...كيفكن ياحريم كيف اخباركن وكيف ازواجكن وعيالكن ، والله لكن وحشه واخيراً اجيتوا عندي...بس سلومي بس.
نور: الحمد لله يسرك الحال ، ماله ابنك ؟ ايش من حليب تعطينه؟ انا جربت لبنتي اكثر من نوع لما عرفت ايش يناسبها، وماشاء الله عليها الان، وابني الله يحفظه قده بالروضه الان...حنان ايش سميتي بنتك الصغيره؟
حنان: سميتها رهف.هي ماشاء الله عليها هادئه .وحمودي قده يمشي ويقول بابا وماما حبيب قلبي .بس يمرض عليا كثير الله يحفظه. ولو شفتوا على غيره يغار من اخته ماتصدقوا انهم اخوان مادريت ايش اعمل لهم.
انجي: يووووه ياانور امسكي ابنك جالس يأذي بنتي...اووووه مررره شقي ابنك ، بنتي هادئه جداً بس لما تكون مع بنات خالتها تشاغب معاهم، ياربي عليها تجنن بي ابوها يموت عليها ، اي شي تطلبه على طول يجيبه لها استوت مدلعه كثير...همسووسه فينه ابنك لا حس ولا خبر؟
همسات: بيكون يلعب بالشارع مع الجهال جنن بي ذا الولد يجلس يلعب بالتراب ويوسخ نفسه وملابسه ، حتى مايرضى ياكل مشان يجلس يلعب وبالروضه يجلس يضرب اصحابه جنن بي.
سمسم: اوووووه مالكم على الجهال، يسلمولي بناتي يجننوا ، مثل الملائكه<< وهم عافسين البيت عفس
...مدري ليش يقولوا عليهم مزعجات ، تقول امي اني اشوف شقاوتهم زي العسل هههههههههه بس يجننو يعجبني البسهم نفس اللبس واعملهم نفس التسريحه ، يتخربطوا بينهم ، صراحه ديما وريما بناتي احسن توأم بالعالم الله يحفظهم لي ويحفظ لكم عيالكم.حتى افكر السنه الجايه ادخلهم مدرسه.
ملاكو: الله يعينك بس معي بنت وحده وجننت بي كيف لو ثنتين..؟ وهذه بنتي بتفلس بي كل مااروح السوق اصرف الفلوس كلها عشانها، على حليب وحفاظات وجلكوز وكورن فلكس وثياب ، ولاعاد اشتري لنفسي حاجه ، عاد ابوها قال نجيب لها اخوااان ..جناااااااااان والله.
اسيل: الله يعينكن بس معي علاوي هادئ وحبوب حتى عماته يتجننو عليه ولا اسمعه يبكي الا لما يجوع اي يشتي تغيير، كنت اشتي اسالكم لما عمره كم يبداء ياكل لانه للان كله حليب بس ، وقد بدأو اسنانه يظهروا، مسكين تعبوه الاسنان كثير.
ملاك: عادي شي طبيعي ،لما يطلعوله اربع سنون اعملي له بسكوت بالحليب، اني عيالي كم كانوا يمرضوا لما تطلع اسنانهم ، لا يناموا لا ليل ولا نهار على طول بكى وحمى بس الان الحمد لله تمااااام.
مزاين: ايوه حتى بنتي تمرض عليا اوووه كم خفت عليها بس جننت بي طول الليل تبكي وبالنهار تنام خربطت عليا النوم، احياناً تبكي اخلي ابوها يخرجها الشارع ترجع مبسوطه، البنت بتستوي صايعه من الان هههههههههههههههه
البنات: ههههههههههههههههههههـ..
وبعد مايكبروا عيالنا وبناتنا :-
مزاين وبإيدها البخور: ياهلا ياهلا نورتوني كيفكن ياحريم واخيراً فضيتوا كلكم مشان نجتمع من جديد ، ماشاء الله قد كبرتوا وكبروا عيالكم ..قبل ماانسى انتوا وبناتكم معزومات على عرس بنتي بعد شهر.. احححححححح بس كم تعبنا ونحنا نجهز لها كل يوم سوق وطلعات.. عقبال عند بناتكن.
اسيل: بالمبارك عليها اي شي اي مساعده لاتستحين امانه ، الا ماقلتي لنا .عريس بنتك ايش يشتغل ومن ولده؟
مزاين: والله انه ابن حلال وطيب هو عاده معاها بالكليه .ربي يحفظهم مارضوا يصبروا لما يخلصوا دراسه .
سمسم: مبارك عليك وعلى بنتك حبيبتي بس كان خليتي بنتك عندك احسن هذولا ازواج بناتي ضبحوا بس وحده مايخليها زوجها تجي عندي غير بالاسبوع مره..!! والثانيه صح انه يجيبها عندي واصل بس بخيل ولاعمره دخل علينا وبيده حاجه..مساكين بناتي مالهن حظ بالزواج.
ملاكو: اووو ماشاء الله مسرع كبروا بناتكم اني بنتي كل مايجيها عريس ترفض، كل واحد تطلع فيه عيب بس عادها جاهله مش حق مسؤليه وزوج وبيت ، بس شاطره بدراستها.
نور: ايوه ماشاء الله عليها بنتك ، بنتي تكلمني عليها لانهم يدرسوا مع بعض ، وابني ماشاء الله عليه تخرج ويدور عروسه ، كنت اشتي اسألك ياحنان بنتك اختطبت ولا لا؟
حنان: لالا بس اختطبت وفسخت خليها تكمل دراسه احسن...ليش تسألي؟
نور: مابخبي عليك احس ابني معجب فيها قلت اسالك عليها.
حنان: ماشاء الله عليه بس البنت عادها صغيره والله يكتب الي فيه الخير....همسات ابنك ساكن معاكم بنفس البيت ولالا؟
همسات : اووووه ايش اقولكم بس هذه مرت ابني الله يهديها بس ..لاتشتي ابني يسكن عندي ولاتشتي ابني يزورني حتى..، حتى لما يزورني يجلس قليل ويقول مشغول ولا يجيب معه حاجه ، لكن مرته كل يوم يوديها السوق ويجيب لها كل شي خلوها على ربكم بس.
ملاااك: ايوه زي ابني كان زمان قبل مايخرج يقول يمه اجيب لك شي معاي ، الان يقول لمرته: حبيبتي اجيب لك شي ..انا الي ربيت ولغيري صفيت، بس ابني الثاني بخليه بلا زواج .. يجلس بلا زواج احسن مايجيب لي مرت ابن زي اخوه.
انجي : يووووه ليش مستعجلات على زواج بناتكم وعيالكم ، خلوهم يعيشوا حياتهم كفايه نحنا ، انا صح بنتي مخطوبه لكن شرط الزواج بعد سنتين. بس بنسوي لها عرس وهوه عرس اصلاً هي الوحيده حقتنا مع انه العرس بعد سنتين بس نجهز له من الان قد شفنا الصاله وكلمنا المصمم حق الفساتين ويدورا على اثاث لبيتهم من الان الله يوفقهم.
عشعش: ان شاء الله يارب ، اني ابني قلت له مافي خرجه من البيت بتسكن عندي لكن مارضى مصمم انه يفتح بيت لنفسه ، بس عادي الله يوفقه اهم شي يكون مرتاح بس مابقدر على فراقه قلت له يشوف لنا اثنين بيوت جنب بعض مشان مايبعد عني كثير، قدنا نجهز ذا كله وهو عاده ماخطب هههههه بس بخطب له قريب اشتي افرح فيه.
ولما عجزوا وصــاروا جـــدات
اسيل: كيف حالكن ياحرييم عساااكن عالقووه كيف اخباركن وكيف شيوبتكن ، من بعد العزاء حق ابوهيثم (زوج ملااك) ماعاد شفتكن.
همساات: ايه والله، انا الحمد لله بنعمه بث الثموحه منكن كنت مريضه ركبي يوجعيني لاعاد اعرف اطلع وانزل بثهوله الله يعين بث .
انجي: لاحول ولا قوه الا بالله ، ثامحيني ياام هيثم ماقدرت اجي اعزيكي بنتي كانت تولد وانشغلت معاها.
ملاااك: لا عادي مثامحات دنيا واخره << تمسح دوعها ذكرت المرحوم... المهم كيف بنتك ثمعت انها تعبت بالولاده الاخيره..
انجي: ايه مثوين لها عمليه بث جابت ولد زي القمر محلااه صدق الي قال مااعز من الولد الا ولد الولد.
عشعش: ايه والله عيال ابنيماخذين عقلي ياحليلهم ، الان بيتخرجوا من الثنويه بث عادني اثوفهم صغار.
سمسم: انا ثامحوني ماعدت اخرج كثير مع الشيبه مريض بالبيت وبناتي كل يوم وحده تجي مشان تثاعدني ، وياقلبي على احفادي يملو عليا البيت ربي يحفظهم ويديني عمر واشوفهم عرسان<< تدمع.
نور تمسح النظارات: الحمد لله تطمنت عليكن .. حنان يابعد قلبي ليه تأخرتي ..
حنان: الثلام ياحريم << توها وصلت... اعذريني كنت امشي على مهلي ماعاد في شده على المشي...
نور: هاااااااااه ويش تقولين..
حنان رفعت صوتها: اقولك مافيني شده على المشي.
نور: يلا محد ياخذ زمانه وزمان غيره عجزنا ولله الحمد.
مزاين بعد ماركبت طقم الاسنان: لالا انا ماعجزت ، اذا انتوا عجزتوا كيفكن مالي دخل، انا لثاتني شباب محد مصدق اني صرت جده وعندي احفاد.
ملاكو: الحمد لله الي اجتمعنا، كنت خايفه وحده تموت قبل مانجتمع ، اهم شي تطمنت عليكن.
:::::::::::::::::::::::::::::::::::::::::::::::
وهذه كانت افضل شله بالعالم
الي رغم مشاغل الحياه
وهمومها..
ومشاكلها..
بس بقوا يجتمعوا
كل ماسمحت ظروفهم
ويحكوا لبعض ايش صارلهم
استوحيت القصه من الواقع لانه ايام الدراسه كانت معي شله وكنا نجتمع ايام الدراسه وكان كلامنا كله حشوش عالمدرسين ،
ولما خلصنا دراسه كنا نجتمع بخطوبه او عرس وحده مننا، واخر مره اجتمعنا ووحده معاها طفله ووحده حامل ووحده عروس وقلت لهم: ياسلام يابنات اول كنا نجتمع ونحنا طالبات ونحش عالمدرسين ، وبعد ماتزوجنا نحش على ازواجنا ، الجمعه الواجيه على عيالنا والي بعدها على الشيوبه حقنا، وكنا نمثل ويش بنسوي وفي كلام كثير من الي كتبته بالقصه كنا نقوله انا وصحباتي من باب المزح وان شاء الله يصير معي ذا كله لانه مافي احسن من شله الدراسه.
ما أجمل الطفوله ،، وصحبه الدراسه
وايام الشباب ،، كلها سعيده كلها سعيده
***
وتقصر الايااام،، تمر في سلااام
ويكبر الصغير يحقق الاحلااام
اتمنى تعجبكم
مع تحيات
اختكم :- بنت يــافــع
Reply With Quote
رد: حشوش البنات ،،، تطورات رهيبة << 2>>
YeMenYah 
~ في صـــنــعــاء عنواني
[/URL
.gif)
(( أحبكم في الله )) 
Bookmarks