الشاعر طلال السعيد
يــا عــيــن
ياعين شوفي كامل الزين يا عين ... شوفي حبيبك وافرحي في قدومه
جودي بدمعات الفرح لا تخشين ... دمع الفرح ياعيني اليوم يومه
هذي حلات الحب صافين الاثنين ... كلن يبيع الود للي يسومه
ان كان قالو بالسنه بس عيدين ... اليوم ثالثهم وبانت رسومه
احنا فرحنا وما نسينا المحبين ... ما ينسا ربعه من يقضى لزومه
الله يهني قلوبهم قولي آمين ... واللي يلوم العاشق الله يلومه
ــــــــــــــــــــــــــــــــــــــــــــــــــ ــ
صــمــت الوداع
فارقت من لاكان ودّي أفارقـه ..... عقب الصلاة وتوّها الشمس شارقه
الفجر يوم الناس تسعى لرزقها ..... أنـا عيوني بازرق الدمع غـارقه
بكى وأنا أبكي يوم وقّفت أودعـه ..... والكـل منّا يذرف دموع حـارقه
سـلّمت ويديني بياديـه ترتجف ..... ويديه بيديني من الخـوف عارقـه
وأقفا وأنا قفيت والصمت حيلتي ..... عز الكـلام ودمعـة الياس فارقه
وحسّيت كن القاع حدري تزلزلت ..... يـوم ألتفتلي وأسـتهلّت غـوارقه
سـرقت من دنياه لـذّات دنيـتي ..... برضـاي سارقني وبرضاه سارقـه
همّي وهـوجاسي وحـبي وغيرتي ..... للي بوسـط القلب ناصـبٍ بيارقـه
وعـوّدت للمطلاع حزينٍ ملتجي ..... والقلب مـّني طـارق الهم طارقــه
ضلعٍ ورا المطـلاع شـوفه يريحني ..... عسـا الحيـا يسقيه لالاح بارقه
كتبت في عاليه حـرفي وحـرفها ..... ورسمت قلب الحب والسهـم خـارقه
ذكرى غـرام مات من قبل ينولد..... بفـراق من لا كـان ودي أفارقــه
ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــــ
ودعـتـهـا
ودعتـها واخـفيت عـنها دمـوعي ..... خـايف تـحس بحسـرتي والتياعي
ودعــتها والقــلب مـني جزوعي ..... جزعٍ من الـفرقا قـليل المساعي
حـيث الفراق لـمن تــولع يلوعي ..... لـوعات فـرقاء ماوراها اجتماعي
في لحـظة الـتوديع هــديت روعـي ..... بـيني وبـين النـفس قـمة صراعي
اخـفـيت مـا حسيت بيـن الظلوعي ..... خايف عـليها لا تـحس بــضياعي
قالت فــمان الله وانطر رجوعي ..... واشـرت بالتوديع حـال استماعي
ساكـت ولارديت ماهي طـبوعي ..... مـن عـبرتي تـفرض عـلي امتناعي
حان الرحـيل وحان وقت الفجوعي ..... واقـفـت وأنـا عـيني عـليها تراعي
بـين الرجا واليأس صـبري يموعي ..... عـلى الـوداع اشـلون قلبي استطاعي
من عقبها اسهر مـسندي راس كوعي ..... لأنام خـالـي البال تـميت واعـي
تومي بـي الحسرات من غير طوعي ..... هـــذا الغـلا ماهـو غـرام صــناعي
اقــنب كما ذيـبٍ تـقـفاه جــوعي ..... لامــن ذكـرت فـراق حـلـو الطباعي
الـلي لاجــله هـان عـندي خـضوعي ..... والله مانسـى دمعته فــي وداعـي
ــــــــــــــــــــــــــــــــــــــــــــــــــ ـــــــــــــــــــــــــــــ
تـعــاتـبـنـي
تعاتبني بنظرات خفيــة ..... وأجاملها ولا ادري وش وراها
أجاوبهـا بنظرات حزينة ..... تعبر عن ضنـا الروح وشقاها
أسايرها وأجاوب كل نظرة ..... وأخبي الوجد وأبحث عن رضاها
وعقب ما شفتها عرفت قلبي ..... تناساها ولكن ما نساها
غلاها يزود مع زود الليالي ..... وباع الناس قلبي واشتراها
وصرت أغار أنا منها عليها ..... خطا نفسي وآنا أتحمل خطاها
وأغار من أمها حتى وأبوها ..... وأغار من الذي بأمره ولاهـا
وأحسد اللي تبره بالرعايـة ..... وأحسد اللي بأحاسيسه رعاها
وأحسد البنـز لا قامت تسوقه ..... أخاف أنه يشاركني غلاهـا
وأحسد الريح لا حرك شعرها ..... وأحسد عيون غيري لا تراها
وأغار من القمر لا شع نوره ..... خذت نور القمر واصبح ضواها
وأحسد الشمس لا بانت عليها ..... أشعتها تسبب في أذاها
وأحسد الأرض لا داست عليها ..... أثر خطواتها تحيي ثراهـــا
وأغار من النجوم إليا تعلت ..... وشافتها وعيني ما تراهـا
وأغار من الهدوم اذا لبستها ..... عساهـا ما تجرحها عساهـا
واغار من الخواتم في يديها ..... وساعتهــا وكل اللي معاها
وأغار من القلادة في نحرها ..... وأغار من الشعر لامن كساها
وأغار من القصيدة لا قرتها ..... ولو هي قصتي واشكي جفاها
وتشمل غيرتي حتى المرايا ..... يحق لهــا بشوفتها تباهـا
نعم وأغار حتى من الوسادة ..... وأحسد فراشها ويا غطاهــا
آلا يا من يساعدني عليهـا ..... يوصلني هوى النفس ومناها
عجزت أعالج جروحي بروحي ..... جروح القلب ما تشفى بلاها
هذة القصايد من قصيد الشاعر الكويتي طلال السعيد
ان شاءالله تعجبكم
تحياتي لكم
Bookmarks