هلا والله اكيد لازم اقولكم عن اللي بداخلي وانتوا اهلي
لازم تسمعوني وتشاركوني الرأي بعد قراء هذا المقال ...
من خلال دراستي وعملي كصحفية رأيت أشياء لاتحمد عقباها لاأعرف أذكر ماذا وأنسى ماذا انما الذي اريد قوله لكم هناك تسميات لبعض الاحياء السكنية وبعض المباني هل انتم موافقون على تسميتها او معارضون وابدائها بالاتي :-
أولا :- حي السعادة بالله عليكم ده حي طبعا للمعلومة اللي مش عايشين بعدن اكيد مابيعرفوه هو حي في مدينة عدن وبالاحرى في مديرية خورمكسر اسمه حي السعادة والله لو رحتوا تشوفوه مابتشفوا غير التعاسه واطلال مباني الله لايوريكم .
ثانيا :- مستشفى عدن العام انا برائي افضل كانوا يسموها ( مستشفى الموت ) او ( مستشفى الصفاف والقادورات ) يعني والله ولا كانك بمستشفى كانك جالس بزبالة او او مصطلح ارقى وكانك جالس بمستشفى خصوصي لنقل الامراض والاوبئه .
ثالثا :- دار الحكمة للتداوي بالاعشاب له فرعين للمعلومه فرع بجانب مستشفى الرازي ايضا بخور مكسر والفرع الثاني عند الانشاءات ايضا بخورمكسر اولا الدكتور صغير ويعالج بعشبه اسمه عشبه سباء اموت واعرف متى درس ؟؟؟؟؟؟؟؟؟ ومتى اشتهر ؟؟؟؟؟؟؟؟؟ ومتى عملت معاه القنوات الفضائية هذي المقابلات اللي عاملها بالاعلانات اللي يوزعه على الناس والله استحقر اي شخص يروح عنده الناس اصبحت بدون تفكير مايفكروا من فين جاب هذي العشبه بنظري اقول امكن وراثه عن ابوه ولا اجداده ياربي عقل الشعب اليمني وخليه يشوف الصح من الغلط.........
رابعا:- مبنى الانشاءت والتخطيط ايضا في خورمكسر لو تشوفوه بتقولوا كذب ايش من اسم ده المفروض يسموه مبنى الخراب والتدمير ايش التراب والاحجار والجدران المكسره ولا مكاتب االموضفين ياربي اطلال مكاتب يارب صبرني ............ ااااااااااااه
خامسا :- كلية الهندسة كله كوم ودي كوم ثاني ايش من هندسة وايش من زفت رحت اعمل لقاء صحفي مع نائب العميد الاستاد مصطفى شمشير اجالي البكاء والله حرام طلبة وخريجين يمثلوا شريحة وكادر قوي للمجتمع يدرس هناك والله تشوف الطالب كله تراب من الحفر والاخزاق اللي بالارض ويجر رجوله كانه خلاص بيموت والله كانه بحرب مش بكلية ولمن تجي تسال اي واحد فيهم تقول قنبلة مؤقتة على طول يسب الدكاتره ويلعن الدراسة واللي جابه الهندسة ويتمنى لو يعود الزمن ويجي امتحان القبول بيغير ميوله ورغبته ياربي صبرهم وصبرني على الظلم ده اللي ماحد قادر يتكلم ويعبر عن رأيه...............
زحفت من الكتابة تصدقوا ايش اذكر وايش انسى احسن بعمل جزء ثاني للموضوع على الاقل ارتاح انا من ده الضغط وترتاحوا انتوا وتبحثوا عن مسميات جديدة لهذي الاماكن اللي احترت في تسميتها غير ( أسم على مسمى ) سامحوني بس حبيت افضفض لكم من جزء من الثورة العارمة اللي بداخلي ............. انتظر منكم الرد الوافي والجواب الشافي على تلك النقاط الخمس المطروحة عليكم وافضل تسميه للخمس الاماكن عليها جائزه وشكرا هههههههههههههههههههههه أختكم ........................ كيان الحب .......................
Bookmarks