شافت لدبله في يدّي وازعلت *** والملامح في محيّاها غضوبه
وسكتت لحظه.. وجتني وسألت *** يا غلا..لا يكون ملكه..او خطوبه
ما قدرت اتكلم وعيني خجلت *** قمت اطالع خاتمي..وانظاري صوبه
حــلّفتني حيل.. حيل تـوسلّـت *** قلت آسف..وادري ما همّتها توبه
قلت كلمه..الدنيا فيها تزلزلت *** قلت روحي بروح غيرك مغصوبه
شفت دمعه تحجرت .. بس نزلت *** من عيونٍ ناعسه كلها عذوبه
طالعتني وطالعت وتأملت *** كنّها تعاتب زماني وكل عيوبه
وبصعوبه حروف من فاها وصلت *** والسكون اصبح كما الريح وهبوبه
اكرهك قالتها ..بس ما تحملت *** والله مسكينه من قليبي وذنوبه
قالت الدنيا من افراحي خلت *** انحكم ابكي من ظروف مكتوبه
قمت انا اتبسم وضحكاتي علت *** وقلت اسف قصتي كلها اكذوبه
كنت اجرب دبله ..يدي فيها ابتلت *** وعلقت ما تطلع الا بكلْ صعوبه
Bookmarks