رسالة إلى الرئيس اليمني .......

بقلم صنعانية

ياسيدي الرئيس انت عارف؟؟

ان ابي قرر يتزوج في عهد الحمدي** قصده ان الدنيا سابرة والامور امور** وبناء اسرة بيكون افضل واسهل مادام الوضع حالي

والعيشة حالية..

بس لما جيت انا للدنيا كان دوري في عهدكم الميمون** قالوا رحم الله الحمدي وذلحين معانا ابن الاحمر رجال**

وقادر يمسك الدفة** المهم كبرنا شوية وقالوا ما قلنا لكم** ابن الاحمر طلع احمر عين ووحد اليمن!!

وخرجنا من المدرسه من جيز الناس فارحين بالوحدة الي كان الاستاذ يقلنا انها حياة جديدة** ولما كبرنا شوية وكنا بنلعب في

الشارع ما شفنا الا الحرب والمضادات بتلون السماء** وفرحنا قصدنا انها العاب ناريه ما كناش نعرف ماهي الحرب ولا ماهي

الازمات السياسية..

تصدق يا سيادة الرئيس انك كنت بالنسبة لنا مثل الامير الخيالي في قصص الاطفال العالمية وكنا نفرح لما يقولوا لنا الرئيس بيمر من

الشارع كم كنا نحبك يا رئيس واحنا اطفال..

وكم تمنينا لو احنا من سنحان ** يمكن نحصل منصب ولا وظيفة**ولا ينولنا من الحظ جانب**اول جمله سمعتها منك ايام الطفوله في

خطاب وانت بتقول ماينفعش عصيد في جمنه** واخر جمله سمعتها منك لما كبرت اشتي مرق من كبشي واشتي كبشي يمشي.. يا

رئيس لا عاد معانا كبش ولا مرق والجمنه اكتسرت من زمان **وحالتنا تعق القلب السالي** والدوله كل يوم بتتقسم بين المشايخ

وانتوا بتقلوا لنا دولة نظام وقانون** واحنا ما شفنا الا دولة شيخ وثعبان**واحناالمواطنين وما نملك مثل الورث يتقاسموه ** الصراحه

تعبنا وانت كل يوم بتعيد لنا

نفس الدرس لدرجة اننا حفظنا الديباجه حق الامامه والرجعية والتخلف والاشتراكية وماخلينا كلمة سب ولعن في الايام الغابرة الا

وقلناها لكن يا رئيس حاضرنا غبار ومستقبلنا غبار..اللمبات موجوده ومابش كهرباء** والحنفيات موجوده ومابش ماء** والاسواق

موجوده ومابش فلوس..

يا رئيس الشعب مالقي لقمة العيش وانتوا بتمكنونا خطابات وانجازات .. يا رئيس الاطفال الي مستقبل اليمن معتمد عليهم ما لقيوا

الحليب وانتوا اعتبرتوه من الكماليات** الشعب بياكلها يابسة وانتوا بتفكروا في الرئاسة وتوريث الحكم لابنكم** ما قلنا شي يحكمنا

من حكم المهم اننا نقدر نعيش**

يارئيس فقدنا الامن والامان**وفقدنا مقومات الحياة الاساسية..

تشتتنا يا رئيس وفقدنا احترامنا في دول الجيران وكأننا مخلوقات مرعبه قادمة من عصر الجاهليه** تقاتلنا مع بعضنا يارئيس

والسبب الاوضاع الي احنا فيها بسبب الكراسي** عيرونا بك يا رئيس وعيروك بنا** واحنا ندافع عنك فليش ما تدافع عننا .. تتذكر

يا رئيس لما دفعت للناس راتب زيادة ايام الانتخابات الرئاسية المساكين حبوك حب مؤقت لانهم كانوامحتاجين للمرتب الاضافي**

شفت كيف احلام المساكين!!

ما رأيك يا رئيس لو تخلينا نجرب حكم الطرف الثاني** وعادي ما يقع لو كنت مواطن عادي مثلنا** انت ابو الديمقراطية في اليمن**

ومافيها لو جاء رئيس غيرك** على الاقل ترتاح وتاخذ فترة استجمام وتبرد من مشاكل المعارضة* والحراك *والحوثه* وخوتم عمرك

بالراحة والسكينة .. الضبح مشترك بيننا وبينك يا رئيس وما يخفى عليك **احنا ضبحنا منك وانت ضبحت مننا والمفروض تخرج

بالمنجزات الي حققتها ويجلس اسمك في لامع في سماء تاريخ اليمن ** بدل ما تنتهي الرحلة العظيمة بمهاترات وبحروب وفتن

ومشاكل .. ولو ما لقينا من المعارضة خير وما قدروش يحققوا الي بيسعوا له عادي ارجعوا رشحوا نفسكم ** ولا ابنكم ولا من

تشتوا** ونافس وبيني وبينك** صدقني مابش معانا ضمانات نضمن المعارضة ولا نضمن غيرها** لكن نجرب والتجربة خير برهان**

على الاقل نخفف الاحتقان**وهذه اخر فرصة تقدر تثبت لنا فيها اننا لما حبيناك واحنا صغارعلى الفطرة** مانفهم شي كان معانا حق**

ومثل ما حققت لنا الوحدة حقق لنا الذي ما تحقق لمدة ثلاثين سنة **والثعابين وريهم العين الحمراء وابدأ في القصقصة وصدقني

الشعب بيكون معك** انت بس جرب ولا تتردد كن صاحب القرار مثل ما عودتنا اوقف مع شعبك واجمع الثعابين في صندوق وريحنا

منهم..

الشعب هم امانه يارئيس** وصدقنا احنا** المواطنين المساكين الي اعيتنا واتعبتنا الظروف السياسية والاقتصادية** مش معقول يا

رئيس الثعابين وعيالهم يعيشوا على حسابنا واحنا نموت من اجلهم.. احنا بنفقد اهلنا واخواننا واولادنا يا رئيس يافي الحروب

والفتن يابسبب المرض والفقر وسوء التغذية..والسبب كله واحد.

يا رئيس احنا عايشين في بلادنا مثل الاغراب العلاج بفلوس *والتعليم يشتي فلوس* والسكن يشتي فلوس* وتنفس الهواء يشتي

فلوس* والاكل يشتي فلوس* والشعب من الطرف للطرف بيشقى لوما تكسر ظهره* تعلمنا يا رئيس وعلقنا الشهادات في البيوت ..

وناس دكاترة ودراسات عليا وما معاهم الا مامعاهم والي ماسكين الكراسي يا رئيس وانت ادرى العارفين ما يعرفوا الا يقروا

ويكتبوا.. زمان يا رئيس كان خريج صف سادس هو البريمو لكن الوقت تغير** والناس تعلموا ولازم تطرحوا الرجل المناسب في

المكان المناسب .. والوجيه الي قد اكل عليها الدهر وشرب المفروض تحولها للعب الجولف ابني لهم ملعب وريحنا منهم** والي قده

في بطونهم يشبع احفاد احفادهم** ولو هم عزيزين عليكم يا رئيس** لكن مش ذنبنا اننا مش من الانساب ** ولا من البلاد** ولا من

الاهل والاصحاب** احنا شعبك** وناسك** وسندك ** وظهرك** من الشمال ولا الجنوب** حتى لو ظلمنا ** نرجع نناشد فيك ابوتك

واخوتك لكل ابناء اليمن** والنصيحة لائمة المسلمين وعامتهم** لكن احنا ما ننصحك** احنا نشتكي لك منك ومن الي حولك..

يا رئيس بلادك مش فقيرة .. طيب مابش بترول ولا غاز ولا به ثروات معدنيه او سمكية .. اقلع لنا شجرة القات وخلي لنا الماء يا

رئيس لاعاد به ماء ولا كهرباء ولا بترول ولا ثروات .. جيفت المدن يارئيس..وقلتوا لنا صنعاء مهددة بالجفاف وما قدرتوا يا رئيس

تنقذونا من القات .. ثلاثين سنه في عهدكم والشعب بيخزن كيماوي ويمرض بالسرطانات والفشل الكلوي وميت عطش وبعدين يا

رئيس تخسروا مليارات في معالجة المرض وفي مكافحة فجيعة الجفاف..

يارئيس .. احنا امانه في عنقك والحياة مش سرمدية.. الوطنيه يا رئيس مش حمل العلم ورقص البرع ولا الشرح على انغام

التراث ** ولا الشعب كله وطني ** مامعه الا البرع والرقص.. الوطنية هي الاحساس بالوطن والاحساس بالامن والامان والاستقرار

وعدم الخوف من الجوع والعطش والمرض والتشرد والحروب واحنا الوطن مثل الذكريات ماكان جميل الا ايام الطفولة..لانه كان كله لعب.
يارئيس الفساد انت قلت ظاهرة عالمية** لكن احنا الفساد عندنا قانون رسمي** ولو ماكنت فاسد افسدوك ولا فصلوك من عملك..

يارئيس الشكوى لغير الله مذله لكن عشمنا فيك وباقي لنا اخر طرف في حبل الامل ..

الادارة يا رئيس فاشلة..والمسؤولين عليها فاشلين.. والفشل يورث فشل

شوف لنا حل يارئيس واخرج لنا بيوم بقرارات تهتز لها القلوب الي في الصدور بصراحة شبعنا خطابات وكرهنا النشرة حق القناة

اليمنية.. لانها عقيمة.. محتاجين لاعمال مش لاقوال وخطابات .. رب دعوة من مسكين افضل من نفاق البطانة الي حولك وانت

عارف انهم منافقين ..

ياريت يا رئيس لو تقدر تحقق لنا في سنتين مالم يتحقق في ثلاثين سنة

واحنا منتظرين خطابكم المهم يا رئيس يوم 22 مايو على احر من الجمر يمكن تخلي حبنا القديم ايام الطفولة لفخامتكم يستعيد الحياة

نسأل الله لنا ولكم الهداية.

منــــــــــــــــــــقول