يا سعود قلبي لطلعة البر شفقان
وهزه من الأشواق كثر اهتزازه
لامن طرالي ما مضا لي من ازمان
أخشى ضلوعي تنكسر كالقزازه
يا سعود هات الجيب وقت الوسم حان
نبي انتخاوى دام أخذنا الأجازه
خوة نشاما من طليقين الأيمان
وكلا ً من التقدير نال امتيازه
جنوب من ليلى مرابيعها زان
منظر طبيعي من طبيعة طرازه
فيه الزهر والورد مختلف الألوان
وريح البختري في هواه ارتكازه
بجواً جميل بظل هتانالأمزان
اللي بحجب الشمس زاد اعتزازه
في فيضةٍ بين الخباري وغدران
كلا على ما راد يلقى اعتيازه
ويا ماحلا وقت الفجر حين الأذان
فرض الصلاة الواجبة وانتهازه
والصبح أشب النار والبال طربان
ياالله صباحاً فيه خير ومفازه
وعلى الجمر قرّب لنا دلال رسلان
والهيل فيها مقنن في ركازه
وسوالفٍ فيها على الهرج برهان
أخير من قولا ً يسبب حزازه
هذا هوى الخافق وتنفيس الأحزان
وإلا العمر تاليه موت وجنازه
محمد حلوان الشراري
