رسالة من الحكومة لأبنها المواطن
عزيزي المواطن بتاع النضال
يا راكب دماغك و غاوي الحلال
نصيحة يا صاحبي بلاش الخيال
و غمض عيونك و ربي العيال
بلاش المناكفة و لايم و عيش
هتتعب معانا و سهمك يطيش
نلفق لأهلك قضية حشيش
و تصبح حكاية و نكتة و مثال
تعالى و هاودنا و عدي الأمور
و عيش في الطراوة و خش الطابور
لكن لو هتزعل و دمك يفور
هنشهد نهايتك في بحر الرمال
هتصبح حرامي هتصبح أمير
هتصبح حرامي و نذل و أجير
و نقدر نلخبط في أصلك كثير
وجدك شحاته حيصبح شحال
حنحلف أن الحبايب شافوك
بتقبض يا خاين و تقتل أخوك
ساعتها مراتك حتلعن أبوك
و تلطم و تنعى أحط الرجال
مالكش أنت دعوة بللي ضاع
و مين اللي كال و مين اللي شال
فحب الحكومة و حب السلام
و علم ولادك يشدوا الحزام
علشان بكرة حياكلو حمام
و ينسوا الاسية و ينسوا الهزال
فلازم يا صاحبي تغمض عنيك
و طنش علينا نطنش عليك
و إياك تشاور نقطع إيديك
و تصبح مواطن ما يسواش ريال
عزيزي المواطن بتاع النضال
يا راكب دماغك و غاوي الحلال
نصيحة يا صحبي بلاش الخيال
الشاعر : أحمد فؤاد نجم
ويبقى السؤال :
متى ستلتفت الحكومه الى الشعب المغلوب على امره في صنعاء وفي عدن وفي كل بقعة من وطننا الحبيب الشعب يصرخ من الالم والحكومه تواجهه بالصميل
تحياتي
أخوكم المهندس وليد الحمري
