عدنان و لينا في الداهوفه حق المعلا

[الجزء الأول]

في حقبة من حق المستقبل .. وفي الداهوفة حق المعلا .. انتصب سوق شامخ ازدحم بالبشر الذي يتصارعون فيه لكسب لقمة العيش .. كان هذا هو سوق القات العتيد .. الذي ظل رغم انتشار الابراج في عدن شاهداً على العصور المزدهرة لتجارة القات

وفي سيارة صالون صاروخية وقف رجل طويل القامة له شاربان حادان مثل المسامير وهو يصيح :
- قااااااااااااااااااات مريسي .. قااااااااااااااااات صوتي .. قرح الكيف ببلاش

وفجأة اقترب منه رجل عملاق يضع عصابة سوداء على عينه .. وفي راسه اثر خياطة .. وسد عين الشمس قدام البائع ..
فصاح البائع :
- شوف هذي الربطة .. قات مريسي على كيف كيفك

فقال الرجل الغامض :
- هذي اخرتك .. تبيع قات بارحي .. الله يرحم ايام السفينة حقك يا قبطان
اندهش البائع وتطلع الى الرجل مليا ثم صاح :
- دكتوووووووووووور رااااااااامي .. مش مصدق انك عايش .. كنت احسبك مت لما جدلوبك بمستشفى المجانين
- لا عادنا ما بموت ذحين يا نامق .. الا قول لي وين سميرة
هز نامق راسه بأسى :
- خليها على الله يا دكتور .. جابت لي درزن عيال ..وطول اليوم صياح على البيس
- المهم لازم نجتمع كلنا .. مستقبل الارض في خطر
- ليش ؟؟ ووين البقية
- عدنان استغل مهاراته وقوته واشتغل حمال في الدكة وعبسي مكنس في البلدية بعد ما شلوا شعره مقاوله ولينا اشتغلت بمزرعة دجاج عشان تعرف تتكلم مع الدجاج والعصافير
امتلئت عينا نامق بالدموع وهو يقول :
- ما شاء الله عليهم .. كل واحد نجح في حياته المهنية .. وايش حصل بجزيرة الامل
- اهيييييييييييييه يا رجال .. وقعت الان منطقة حرة تسوي اللي يعجبها .. وكردوا الناس اللي فيها .. المهم الموعد بيننا الليلة بعد نص الليل في القلوعة جنب النفق .. وجيب معاك سميرة
- حاضر يا دكتور رامي

ثم اخرج نامق شكل قات تلتمع اوراقه الخضراء الزاهية وقال :
- وخذ هذا الشكل القات اللي مخبيه للحبايب ..

*********

بعد منتصف الليل اجتمعت شلة الانس المكونة من نامق وسميرة وعدنان ولينا وعبسي والدكتور رامي
كانت سميرة قد اصبحت سمينة تمشي وهي تسحبب الشحم وراها .. وعدنان زي ما هو بس بدال السروال القصير والجرم بدا يلبس معوز وعلى راسه مشدة .. وعبسي زي ما هو بس صار سمين وخادم وشعره وقع زي المكنس الريش .. اما لينا فحصوة بعين الحسود زي ما هي بس صارت تسوي حامورة وبودر ومكياج ثقيل

ساعة ما التقت لينا وسميرة صاحت سميرة :
- او او لينااااااااااا ... او يحرق قلبك ايش دي الحلاوة يا بنت .. ايش دي الشياكة .. اوبهي تقولي لي تشتغلي سكرتيرة
- او ايش اقول لك انتي يا اختي .. مالك كدا وقعتي زيما الكبة .. فين سميرة حق زمان .. كيف شمت بك الزواج
مطت سميرة شفايفها وهي تقول :
- دا كله من نامق ربي يقصف عمره .. وجع لي قلبي .. حابسني بالبيت مع الجهال .. تصدقي اني نسيتو كيف كنت اضرب بالمسدس ...
ثم ادنت راسها من راس لينا وهي تساررها قائلة :
- او شوفي عدنان كيف وقع شكله يفجع .. ماله لابس معوز مقطع كذا ؟؟ ايش الحمالين ما يكسبوش فلوس ولا ايش ؟؟؟
- ولا شوفي عبسي وقع خادم اصلي .. ولا جدي رامي اللي جدلنابه بالمصحة وخرج زيما الجني .. شوفي ولا كأنه اتغير

صاح الدكتور رامي قائلا :
- انتبهوا جميعا .. هناك كارثة ستحصل
ارتفعت الاصوات وصاح عدنان :
- ايش من كارثة يا دكتور رامي .. لا تسويش زي الافلام واتكلم على طول
قال الدكتور رامي :
- علام ظهر من جديد .. وصنع جهاز استخراج الطاقة الشمسية
قالت سميرة :
- وفين ذا الجهاز يا دكتور ؟
- في فندق عدن مو فيبك

مطت سميرة شفايفها وهي تقول :
- ولا فيبي حاجة .. ليش تسأل

حمر الدكتور رامي وهو يصيح :
- يا دبا اعقلي .. الفندق اسمه موفيبك
- او او .. اسمه موفنبيك يا دكتور .. مالك كذا استويت ما بك سخا .. كل دا من المصحة

ضحك الدكتور رامي بصوت عالي حتى بانت اسنانه كلها ما عدا ضرس العقل اللي خلعة قبل ما يتجنن ويدخلوه مستشفى السلام ثم قال :
- كله واحد يا سميرة .. المهم لازم نفركش خطط علام للاستيلاء على الارض .. من الذي سيواجه علام معي ؟؟

التقت العيون ثم صاحوا بصوت واحد :
- كلنا معك يا دكتور .. تحيا مصر

صاح الدكتور رامي :
- لكم ام الصبيان تشلكم .. ايش من مصر .. مو شفتوا نحنا بفلم مصري ؟؟؟

ثم ضحكوا جميعا وقد عزموا على التصدي لمخططات علام الشريرة

وسنرى في الجزء الثاني كيف سيفعل ابطالنا الشجعان
الدكتور رامي المجنون
والمقوتي نامق
والدبا سميرة
والحمال عدنان
والخادم عبسي
والبطلة الجميلة لينا

[الجزء الثاني]

في ظلمة الليل تسلل ابطالنا الشجعان ..
وبعد ما قفزوا السور حق فندق عدن موفنبيك وصاروا بالحديقة توقف الدكتور رامي وقال :

- اسمعوا .. خلونا نراجع الخطة .. عشان أي واحد طبح ما حفظش هذي فرصتة الاخيرة عشان يفهم ..
بنتوزع ثلاث مجموعات .. عدنان مع لينا ونامق مع زوجته الدبا وانا الله يخارجنا على عبسي

صاحت سميرة بغيظ :
- ايش من دبا يا اعور .. شوف بتحترم نفسك ولا قسم بالله بضربك بالشنبل على راسك الصلعة

تجاهلها الدكتور رامي ( كبر عقله ) وقال مستأنفا :
- الهدف هو الوصول الى السطح وتدمير جهاز استقبال الطاقة الشمسية .. اول واحد يوصل هناك يركب القنبلة هناك .. مستعدين ؟؟

قالوا كلهم بصوت واحد :
- مستعدين

فقال بحماس :
- اخر واحد حمار

وانطلق يركض فتبعه عبسي وانطلق عدنان ولينا باتجاه ونامق وسميرة باتجاه ثاني

كان عبسي يركض بعد الدكتور رامي وكل دقيقة صاح :
- أي ,, أأأأأي ..

فيقول الدكتور رامي :
- مالك يا عبسي ايش في ؟
- شعري يا دكتور يحنب بكل حاجة اجزع من جنبه
- كنت بتحلقه وريحت نفسك .. بدال ما هو زي شعر الجن
- مقدرش يا دكتور .. بيطردوني من الشغل .. اصل شعار البلدية هذي اليومين صار النظافة بكل شيء حتى بالشعر .. واخذوا شعري دعاية

واختاروا ان يطلعوا بالمصعد وفي المصعد قال عبسي :
- اشتي اسألك حاجة يا دكتور
- اسأل يا عبسي الجن
- اللي اذكره انك في الحلقات الاخيرة حق عدنان ولينا مت وجدلوا بك في البحر .. كيف رجعت بهذي القصة ؟؟؟

سكت الدكتور رامي قليل .. وبعدين لطم بيده على راسه وهو يقول :
- أخ .. والله نسيت يا عبسي .. كله من المخرج .. قدنا قلنا سكهنا من المسلسل هذا والسحببه من مكان لمكان ..
مش داري كيف راح عن بالي اني الان ميت .. مخرجين اخر زمن

لكزه عبسي في جنبه وهو يقول :
- اهيييه يا دكتور .. عليا ؟؟ اكيد دفع لك زايد ناقص ولا ما كنت بترجع ..

قال الدكتور رامي وهو يشير الى السجارة في يده :
- وهذا سمي يا عبسي انه ولا دفع لي بيسة
( هذا من الحلف الذي ينتشر بين العامة وهو لا يجوز وقد روي عن الرسول صلى الله عليه وسلم : من حلف بغير الله فقد اشرك )


وبينما هم يتكلمون كان عدنان ولينا قد اختاروا الدرج لأنه مأمون
وقالت لينا :
- او مالك كذا يا عدنان اتغيرت .. ليش كذا اتبهدلته ؟؟
- ايش اقول لك يا لينا .. الدنيا وقعت غالية .. ولي سنة ادور على فيزة لأمريكا ما سمحوا لي .. قلت بدخل بفيزة عمرة ضحكوا عليا وقالوا لما تقع السعودية ولاية امريكية رسميا بيسمحوا لي J

وبينما هم يتكلمون اذ ظهر فجأة مجموعه من الجنود يضعون نفس الاقنعة التي رأيناها في عدنان ولينا الجزء الاول .. فعلى طول عدنان طلع الرشاش وتبادل معاهم اطلاق الرصاص ..
وفجأة صاحت لينا :
- ستوب .. وقفوا بسرعة

فتوقف اطلاق النار وصاح عدنان :
- ايش في يا لينا .. عادنا ما كملت عليهم ؟؟
- عشاني يا عدنان سوي الحركة الرهيبة حقك
- ايش من حركة يا لينا بطلي جنان ؟؟
- الحركة حقك لما تصد الرشاش برجلك وتطلع عليه وتزبط الجندي بعدين بوجهه

صاح عدنان من الضبح :
- يا لينا ما ينفعش .. ذا كان في الجزء الاول .. دحين انا لابس معوز .. ما ينفعش
- اني فدالك يا عدنان .. اخر مرة اخر مرة

وبينما هم يتكلمون صاح واحد من الجنود :
- بتخارجونا اليوم ولا ايش معانا ومعاكم ؟؟ ضبحنا ونحنا نراعي لكم .. ذا مسلسل من حق ام الجن

صاح عدنان :
- ناهي يا جني .. بس لحظة بتفاهم مع لينا
وقال للينا :
- يا لينا انا فدا رجولك بعدين مش الان .. بتخزيبي وانا لابس المعوز
- دحينه ولا ما بكمل

هز عدنان راسه وقال :
- امري لله .. الله يخارجنا ..

وقال للجنود :
- طب يا مستعجلين استعدوا انا الان بقفز فوقكم زي الجزء الاول
- حاضر .. بس دلى دلى

وقفز عدنان فوقهم فضربه احدهم بالبندق فصد عدنان الضربة برجله وبقوته نزل البندق وطلع فوقه برجل ولما رفع رجله عشان يزبط وجه الرجال الجميع سمعوا صوت : زيييييييييييييييييييييييييط

صاح عدنان :
- جني يشلك يا لينا .. عجبك ؟؟ انقطع المعوز
ردت لينا :
- واني ايش دخلي .. حد قال لك تلبس معوز

واستمروا هكذا في الصياح ولا نعلم ما دار بين نامق وسميرة
وهذا ما سنعرفه في الحلقة الثالثة والاخيرة من عودة الابطال

[الجزء الثالث]

كان نامق وسميرة قد اختاروا سلم الطوارئ للوصول الى السطح

وكانت سميرة توقف كل دقيقة وتنهف وهي تصيح :
- او يقصف عمرك يا نامق .. باموت .. شوفني باموت من دي الدرج ..

وجلست وهي تصيح :
- يا مااااااه حبيبي .. من صدق شوفني باموت يا ناااااااااامق

صاح نامق بغضب :
- لا تقاطعيش .. قولي ان شاء الله

اتكنترت سميرة وصاحت :
- ان شاء الله انته واللي يكرهني .. كله منك .. حبستني بالبيت لما وقعتوا دبا .. لكني اني بوري امك يا مدعس .. يا قبطان السفينة الغارقة

صاح نامق :
- شوفي سكتلك لما ذكرتي امي .. وسكت لك لما سبيتي لي .. لكن كله ولا السفينة .. احترمي نفسك يا ام تامر

وفجأة سمعوا صوت حازم يقول :
- ارفع يدك انت والبرميل اللي جنبك

التفتوا ووجدوا اللي ما يتسماش نمرو

صاح نامق :
- انت مع الاشرار يا نمرو .. اكيد .. شرير من يومك

ضحك نمرو ضحكه رقيعة ( زي ضحكة فوزي في مسلسل الحيالة )
- ها ها ها هاااااااااااااي .. الواحد لازم يلعب من الطرف الكسبان ..

قال نامق :
- قدك ما تتعلمش من الجزء الاول .. الاشرار لازم يموتوا والطيبين ما عدا البرميل اللي جنبي هم اللي ينتصروا

وفجأة اخرج نامق من جنبه عود قات مريسي طويل وقفز نحو نمرو وهو يقول :
- تعال قاتل يا جبان .. برويك نامق كيف يسوي بالعود القات

كان نمرو مستعد فأخرج عود قات شامي طوووووووووووييييييييل فصعق نامق وهو يقول :
- قاااااات شامي ؟؟؟ خياااااااااانة

وقعد هو ونمرو يتباروزا وبالتأكيد انتصر القات الشامي وانكسر العود المريسي وقال نمرو :
- قدنا قلت لك .. ما بينفعوك اصحابك الان

وفجأة قفز نامق وزبط العود الشامي من يد نمرو واعطاه دكمه بوجهه وقال :
- بسرعة يا سميرة اقفزي فوق بطنه لما تطلع عماصيره .. عشان يعرف ان الله حق

وسميرة ما كانت من العاجزين .. سحببت اطنان الشحم وقفزت فوق نمرو لما كانت بتنكع عيونه لبرع ..

وبعد ما ربطوه بالحبال رجعوا يطلعوا للسقف ولما وصلوا لقوا السطح هادئ وبعدين اجى عدنان ولينا وبعدين الدكتور رامي وعبسي
قال عبسي :
- كيف وصلوا قبلنا يا دكتور ونحنا طلعنا المصعد .. وخاصة نامق والبرميل اللي معه كيف وصلوا قبلنا

قال الدكتور رامي وهو يحك راسه :
- والله مدريش كيف وقعت ... يمكن المؤلف الفشفشي يشتي يوري اننا بزمان مقلوب

ثم التفت اليهم الدكتور رامي وقال :
- شفتوا هذا الديش الكبير .. هذا هو جهاز امتصاص الطاقة الشمسية

واسرعوا ليضعوا القنبلة وفجأة سمعوا ضحكه ساخرة وصوت يقول :

- اخيرا وقعتم في الفخ .. اخيرا سيكون انتقامي كبيرا

صاح عدنان :
- علااااااااااااام .. كنت احسبك مت لما انفجرت الطائرة .. لكن اخرتك على يدي هذي المرة

- ها ها ها هااااااااااااي ( حتى علام باين عليه شاف مسلسل الحيالة وصارت ضحكته زي فوزي ) فجعتنا يا حبي .. وعشان تعرفوا ان اخرتكم قربت لازم تعرفوا السقف كله ملغم طماش .. من كل الانواع .. ابو صاروخ وابو ذبالة وابو ضوء وكل الانواع وحشيت كل طماشة حاجات من اللي بالي بالك وبيقع صوت وريحة بتخلي الواحد روحه تطلع بدقيقتين ..

ثم ضغط زر في جهاز في يده وقال :
- بعد دقيقة بالضبط بينفجر كل الطماش اللي في السقف .. وهذي اخرتكم يا ابطال الداهوفة ..

عدنان على طول سحب يد لينا عشان يهربوا .. وبهذي الساعة طلع عرق المخدامة حق لينا مرة ثانية وقالت :
- عدنان اني فدالك اخر مرة ..

عدنان ذي اللحظة كان بيشد شعره من القهر وقال :
- اووووووووووووووووف .. ايش معانا ومعاك يا لينا .. ايش تشتي المرة ذي .. بسرعة قبل ما تنفجر الطماش
- اشتيك تقفز من السقف للارض وانت حاملني

عدنان لانه كان عاقل وعارف ان لينا ما بتتراجع قال :
- امري لله تعالي ..

ولما وصل للطرف الثاني من السطح حمل لينا بين يديه واتجه نحو حافة السقف ..
ساعتها لينا قالت :
- يا رب لا تخلي نهاية عدنان على يدي يا رب لا تخليهوش يموت هذي المرة ..

عدنان شهد وكبر وقفز قفزه جبارة ... بس نسى انه لابس المعوز ما وصل للارض الا وقده ملح .. يعني ولا بقت عظمة سليمة بجسمه ..

اما علام فقد اسرع نحو مركبة صغيرة في السقف فنامق سحب سميرة عشان يلحقوا به ولما وصلوا للمركبة كانت قد بدأت في الطيران واتعلقوا بالمركبة وعلام احتط واشتل .. وهو يصيح :
- يا ناااااااااامق الله يشلك .. ما لقيت الا البرميل ذي عشان تعلقها بالمركبة .. المركبة ما تستحمل هذا الوزن الزيادة .. جعلك سكته بقلبك آمين ..

ضحك نامق وهو يقول :
- انا قصدت ذا الشي يا حبي .. انت تحسب بنخليك تهرب بالساهل ؟؟

المهم بالزجى ارتفعت المركبة قليل وهي تترجرج وتناتع زي السيارة الديزل وبعد ما خلاص كان اجالهم صفار وقعت السفينة بالارض .. وساعتها قفز نامق فوق علام واعطاه دكمه ثم كملت عليه سميرة لما قفزت فوق علام ونفس نمرو عيونه كانت بتنكع من قفزة سميرة


اما عبسي فطلع به عرق المخدامه وساب الدكتور وعلى طول نزل بالدرج حق الفندق والدكتور رامي اقتنع انه ادى دوره على اكمل وجه فقعد في السقف لما انفجرت الطماشات وبهذا انتهت حياته معفن

****************

في مستشفى الجمهورية التف الابطال حول سرير عدنان اللي وقع مثل المومياء من كثر ما ربطوه بالشاش ..
وكانت لينا بجواره وهي تفلي شعره المليان قمل ..

صاحت سميرة :
- اااااااااااو الف الف مبروك يا لينااااااااااااااااا .. سمعتوا انه انتي وعدنان بتتزوجوا بعد ما يعملوا له سرويس وتبديل قطع الغيار

ضحكت لينا وقال :
- او ملى يا اختي اني راعيتوا له كثير .. لازم الحق منه حاجة قبل ما يحصل له حاجة في المغامرة الجاية

ثم تذكرت شيء فقالت :
- ايش وقع في علام ؟؟
- مصيبة تحرق قلبه .. جدلنابه بالمكان اللي على بالي بالك وما اشتيش اقول الاسم عشان ما يجدلوبي اني كمان هناك .. وهناك بيخلوه يشوف امه عروسة
- احسن .. يستاهل ..... ما دام دخل هناك ما بيخرج الا لما يحمض وينسى اسمه

والتفتت لينا نحو الجميع وهي تقول :
- اهم شي اننا افسدنا مخططات علام .. ولازلنا فريق واحد ضد كل الاشرار .. اليس كذلك يا اصدقائي

التقت اعينهم وصاحوا بصوت واحد :
- صحيح .. فريق واحد .. تحيا الداهوفة حرة مستقلة

ملاحظتان :
(1) الداهوفة هي ذلك الحوش الكبير الملئ بالسيارات القديمة و المدحملة الواقع خلف المشروع السكني السعودي في المعلا.
(2) الموضوع منقول و لكني لما قرأت الموضوع اتفحررت من الضحك لما عيوني اتشقلبوا و حبيت انكم تنبسطوا شويه ...

تحياتي