جناح حمامة ..
يقــــــــــول :
هبت هبوب الحزن والحزن مقسوم
للآدمي حتى تطابق عظامه!
وأنا اتنفس منه، لـو كـان مسموم
واللي يشمه ما يشم السلامه!
أيام اعيش بخير، وأيام مهموم
واللي مطيحه صعب، يصعب مقامه
كم لي وانا في خاطري زحمة علوم
وكـم ليل ضيعني تشابك ظلامه
ما نيب فـي ذله ولاني بمعدوم
أملك وجه، لكن بدون ابتسامه
ابعد لزوم ان جيت له شبه ملزوم
اقرب لراسي مـن خيوط العمامه
لو ان قلبي ف..آخر الوقت مظلوم
زودت حمله لين ضاع اهتمامه!
حوله حمام يحوم واشواقه تحوم
حر، بلا برقع لمح له لثامه!
لا اقبل على اللي شافها اقبال محروم
نتفت حبه مـن جناح الحمامه
مابيه يرجع لي مـن الحب مصدوم
ولا ابيه يفقد ف.. القلوب، احترامه
ماله ومال الشك والخوف واللوم
وصمت يـرده لايكمل كلامه!
يبقى بقفص صدري مقدر ومحشوم
مقيم وآمله دوام الاقامه
وانا بفصلّي مـن احلامي هدوم
من خام صبر، ومن خيوط الصرامه
والله ما اغبط غير من يقضي اليوم
من البيت.. للمسجد.. لمبنى دوامه!
ولا الحياه ظروفها دايم الدوم
خلف الحزين، وفوق راسه، وامامه!
قلبي قبل (20) ماهوب موسوم
واليوم له في كل قفله، علامه
الحزن ماهو اللي يردك عـن النوم
بالعكس انا لاشان يومي آنامـه
لكن ياعمري تريح ومخدوم
لاتلحق أيامك عشاني ملامه!
وان كان لي فرحة تكفي لها يوم
ياربي اجعلهـا ليوم القيامه!
للشاعر .. عفاس بن حرباش .. منقوووول ..
تحياتــــــــــــــــــــي..
